[ad_1]
जळगाव : शासकीय उदीद, मूग खरेदीसंबंधीची प्राथमिक कार्यवाही सुरू झाली आहे. परंतु, यासंदर्भातील ऑनलाइन नोंदणीला शेतकऱ्यांचा कमी प्रतिसाद आहे. मूग विक्रीसाठी जळगाव, पाचोरा व अमळनेर येथील तीन खरेदी केंद्रांवर एकही नोंदणी झालेली नाही.
मुगाचा शासकीय दर ७१९६ रुपये प्रतिक्विंटल, तर उडदाचा शासकीय खरेदी दर ६००० रुपये प्रतिक्विंटल, असा आहे. या दरात मूग, उडदाची खरेदी शासकीय केंद्रात केली जाईल. खरेदी सुरू करण्याची तारीख अजून जाहीर झालेली नाही. परंतु, तीन ठिकाणी खरेदी केंद्र निश्चित करून ऑनलाइन नोंदणी गेल्या मंगळवारी (ता.१५) सुरू झाली आहे.
यात उडीद विक्रीसाठी जळगाव येथील केंद्रात शनिवारपर्यंत (ता.१९) १५ शेतकऱ्यांची ऑनलाइन नोंदणी झाली होती. पाचोरा व अमळनेर येथील केंद्रातही उडीद विक्रीसंबंधी शेतकऱ्यांनी अर्ज सादर केले आहेत.
मूग विक्रीसाठी जळगाव जिल्ह्यात कुठल्याही शेतकऱ्याने नोंदणी केलेली नाही. मुगाचे पीक अतिपावसात १०० टक्के वाया गेले आहे. तर, उडदाची मळणी अनेक भागात राहिली आहे. मळणी करून काही भागात शेतकरी उडीद वाळवून घेणे, त्याची स्वच्छता, प्रतवारी आदी कार्यवाही करून घेत आहेत.
उडीद व मूग खरेदीची मर्यादा जाहीर झालेली नाही. कृषी विभागाचा पीक कापणी अहवाल आलेला नाही. कृषी विभागाकडे मूग व उडीद उत्पादकतेची माहिती मार्केटिंग फेडरेशनने मागितली आहे. परंतु, ही माहिती कृषी विाभागाने सादर केलेली नाही. खरेदीची किती करायची व केव्हापासून करायची, याबाबत शासनाने मार्गदर्शक सूचना दिलेल्या नाहीत.
यामुळे खरेदीसंबंधीची प्राथमिक तयारी करून ठेवली आहे. गोदामे सर्वत्र उपलब्ध झाली आहेत. जळगाव जिल्ह्यात मुगाचे, उडदाचे अतोनात नुकसान झाले. यामुळे यंदा शासकीय मूग, उडीद खरेदीला किती प्रतिसाद मिळेल, याबाबत प्रश्नचिन्ह आहे.
खरेदीसाठी तीन केंद्रांमध्ये ऑनलाईन नोंदणी सुरू आहे. मूग विक्रीसाठी कुठल्याही केंद्रात नोंदणी झालेली नाही. उडीद विक्रीसाठी प्रतिसाद मिळत आहे. पुढे याबाबत प्रतिसाद मिळू शकतो.
– गजानन मगरे, पणन अधिकारी, मार्केटिंग फेडरेशन
[ad_2]
Source link